D’óstáil National Broadband Ireland (NBI), an comhlacht atá ag cur an Phlean Náisiúnta Leathanbhanda (NBP) i bhfeidhm, imeacht inniu (Dé Céadaoin) in Acaill chun na chéad naisc le leathanbhanda snáithín ardluais ar an oileán iargúlta a chomóradh.
Tá na príomhoibreacha tógála ar bhonneagar an oileáin críochnaithe anois, rud a chuireann ar chumas breis agus 2,500 teach, feirm agus gnólacht leathanbhanda ardluais a fháil. Ciallaíonn sé seo go mbeidh an rochtain chéanna ag cónaitheoirí an oileáin is mó in Éirinn ar leathanbhanda iontaofa 2 ghigibheart is atá ag aon cheann de na 385,000 áitreabh atá ceangailte ag NBI cheana féin.
Bhí an tAire Cultúir, Cumarsáide agus Spóirt, Patrick O’Donovan, T.D., ag an ócáid, chomh maith le hionadaithe áitiúla poiblí, grúpaí pobail agus cónaitheoirí an oileáin.
Dúirt an tAire O’Donovan: “Tá an Plean Náisiúnta Leathanbhanda ar cheann de na tionscadail bhonneagair is mó de chuid an Stáit ó leictriú na tuaithe, agus cinntíonn sé nach bhfágtar ar lár aon phobal, baile ná gnó ó thaobh nascachta de. Is síneadh nádúrtha ar an sainordú seo bonneagar leathanbhanda a sheachadadh chuig cónaitheoirí Oileán Acla.
“Tá lúcháir orm a bheith anseo inniu chun an tionchar a imríonn an infheistíocht agus an nascacht seo le leathanbhanda ardluais ar thithe, ar ghnólachtaí agus ar phobal an oileáin ar fad a bhainfidh tairbhe as na blianta amach romhainn.”
Dúirt David McCourt, Bunaitheoir agus Cathaoirleach National Broadband Ireland: “Táimid ag obair in NBI de réir shainordú an Rialtais chun a chinntiú nach bhfágfar aon bhaile, sráidbhaile ná pobal ar lár faoin bPlean Náisiúnta Leathanbhanda. Níl aon áitreabh rófhada faoin tuath ná ró-iargúlta agus táimid bródúil as bheith anseo in Acaill – ceann de na 27 n-oileán amach ón gcósta inár leathadh amach – chun infhaighteacht ár líonra snáithín den chéad scoth a chomóradh.”
Dúirt T.J. Malone, Príomhoifigeach Feidhmiúcháin National Broadband Ireland: “Tá sprioc thábhachtach bainte amach ag NBI trí bhonneagar leathanbhanda snáithín a chur ar fáil in Acaill, agus tá ríméad orainn go bhfuil custaiméirí deiridh nasctha cheana féin agus go mbaineann siad tairbhe as na buntáistí a bhaineann le leathanbhanda iontaofa ardluais. Is céim mhór chun tosaigh í seo don nascacht dhigiteach, ag cabhrú le daoine fanacht nasctha, cianobair a dhéanamh, sruthú go héasca, agus rochtain a fháil ar sheirbhísí ríthábhachtacha ar líne.
“Is é leathanbhanda snáithín an leathanbhanda is fearr maidir le hidirlíon tapa, iontaofa – agus a bhuíochas don Phlean Náisiúnta Leathanbhanda, is féidir le neart tithe agus gnólachtaí ar fud na hÉireann an t-athrú a dhéanamh inniu. Trí aistriú go snáithín, is féidir le húsáideoirí na teorainneacha a bhaineann le líonraí copair atá as dáta a fhágáil ina ndiaidh, ar líonraí iad nár dearadh riamh chun freastal ar éilimh shaol digiteach an lae inniu.”
Dúirt custaiméir áitiúil nasctha agus úinéir House of Achill, Anna Sutcliffe: “Ó cheangail mé le Líonra NBI™ trí Imagine, tháinig an-fhás ar mo ghnólacht. Go traidisiúnta, bímid ag brath go mór ar shéasúr na turasóireachta ar an oileán. Anois agus snáithín agam, tá ceangal tapa, iontaofa agam ar deireadh chun tacú le díolachán ar líne agus seirbhís do chustaiméirí a chinntiú don bhliain ar fad. Anois is féidir liom díriú isteach ar an rud is mó a thaitníonn liom faoin ngnólacht: a bheith cruthaitheach.
Dúirt Glenda Brady, Stiúrthóir Tráchtála Imagine: “Ag Imagine, bhí ár bhfréamhacha i gcónaí faoin tuath in Éirinn agus i bhfreastal ar phobail ar nós Acaill. Táimid an-bhródúil as an toradh seo. Le nascacht snáithín, beidh úinéirí gnó, ar nós Anna, in ann margadh i bhfad níos mó atá nasctha go digiteach a bhaint amach, is cuma cén áit a bhfuil siad ina gcónaí.”
Dúirt custaiméir áitiúil nasctha agus úinéir Chaifé Lilí Bán, John Barrett: “D’oscail mé Caifé Lilí Bán sa samhradh i 2021 agus thuig mé go tapa go raibh dúshláin ag baint le gnó a reáchtáil in Acaill. Gan leathanbhanda snáithín, is minic a mbíodh tionchar ag an aimsir ar chomhartha agus ar iontaofacht an naisc. Ó cheangail muid le snáithín NBI trí Westnet, is athrú ó bhonn a bhí ann. Is féidir linn anois áirithintí ar líne a bhainistiú sa chaifé anois agus meaisín cárta a oibriú. Táimid ar bís chun gnólachtaí nua a fheiceáil ar an oileán agus bhí baint an-mhór ag an nascacht snáithín leis sin.”
Dúirt Paul Cunnane, Príomhoifigeach Feidhmiúcháin Westnet: “Tá láithreacht sheanbhunaithe ag Westnet ar an oileán. Tá bonn láidir custaiméirí tógtha againn anseo thar na blianta, agus nuair a chualamar go raibh rochtain ar leathanbhanda snáithín ar fáil tríd an Líonra NBI™, bhíomar réidh. Anois go bhfuil snáithín anseo in Acaill, ciallaíonn sé go bhfuil an rochtain chéanna ag daoine atá ina gcónaí, ag obair agus ar saoire ar obair, ar shiopadóireacht agus ar shruthú agus atá ag duine ar bith i gcathair mhór, ach i gceann de na háiteanna is áille ar domhan. Is cuma más nasc lánaimseartha nó pacáiste tí saoire atá á lorg agat, beimid in ann freastal ort.”
